Антикоррупция

Ўзбекистон Республикаси Иқтисодиёт ва молия вазирлигида коррупцияга қарши курашиш тўғрисидаги қонунчилик талаблари асосида коррупцияга қарши ички назорат тузилмалари фаолияти йўлга қўйилган.

Хусусан, Ўзбекистон Республикаси Президентининг 2022 йил 21 декабрдаги «Янги Ўзбекистон маъмурий ислоҳотларини амалга ошириш чора-тадбирлари тўғрисида» ПФ-269-сонли Фармони билан ташкил этилган Иқтисодиёт ва молия вазирлигининг Коррупцияга қарши курашиш ва комплаенс назорати бўлими вазирлик марказий аппаратининг таркибий тузилмаси бўлиб, бевосита вазирга бўйсунади.

Вазирлик тизимида Коррупцияга қарши курашиш ва комплаенс назорат бўлими (ҳудудий бош бошқармаларда бош мутахассис лавозими) ўз фаолиятини Ўзбекистон Республикаси қонунчилиги, шунингдек, коррупцияга қарши курашиш тўғрисидаги қонунчилик ҳужжатлари асосида олиб боради.

Коррупцияга қарши ички назорат тузилмалари ходимлари ўз фаолиятида коррупцияга қарши курашишнинг асосий принциплари, яъни
– қонунийлик;
– фуқаролар ҳуқуқлари, эркинликлари ва қонуний манфаатларининг устуворлиги;
– очиқлик ва шаффофлик;
– тизимлилик;
– давлат ва фуқаролик жамиятининг ҳамкорлиги;
– коррупциянинг олдини олишга доир чора-тадбирлар устуворлиги;
– жавобгарликнинг муқаррарлиги принципларига амал қиладилар.

Бўлим фаолияти коррупцияга қарши курашиш соҳасидаги давлат сиёсатининг асосий йўналишлари асосида олиб борилади, хусусан,
– аҳолининг (ходимларнинг) ҳуқуқий онги ва ҳуқуқий маданиятини юксалтириш, жамиятда (меҳнат жамоаларида) коррупцияга нисбатан муросасиз муносабатни шакллантириш;
– вазирлик тизимининг барча соҳаларида коррупциянинг олдини олишга доир чора-тадбирларни амалга ошириш;
– коррупцияга оид ҳуқуқбузарликларни ўз вақтида аниқлаш, уларга чек қўйиш, уларнинг оқибатларини, уларга имкон берувчи сабаблар ва шарт-шароитларни бартараф этиш, коррупцияга оид ҳуқуқбузарликларни содир этганлик учун жавобгарликнинг муқаррарлиги принципини таъминлаш.

Бундан ташқари, коррупцияга қарши ички назорат тузилмаси вазирлик тизимида коррупцияга қарши кураш бўйича ИСО37001:2016 халқаро стандарти талабларига жавоб берувчи комплекс тизимига асосан коррупцияга қарши курашиш тизимини жорий этиш ва ривожлантириш, коррупциявий ҳолатларни барвақт аниқлаш ва уларнинг сабаб ва шарт-шароитларини бартараф этиш, коррупциявий хавф-хатарларни аниқлаш ва манфаатлар тўқнашувининг олдини олиш, коррупцияга қарши профилактик чора-тадбирларни ташкил этиш, коррупцияга қарши курашиш соҳасидаги давлат дастурларининг ижросини таъминлайди.